Skulestart med elevrekord
Tryggheim vgs. har 575 elevar!
Vg1-elevane starta med opningsfest og aktivitetar laurdag 16. august. Då Vg2- og Vg3-klassane vende tilbake måndag 18. august, blei det totale elevtalet på rekordhøge 575 elevar. Rektor Gjermund Viste er glad for den store interessa for å gå på Tryggheim og andre kristne friskular.
- Det som slår meg mest i år, er at internatskulane i Noreg ikkje er store nok, seier Gjermund.
Av årets 575 elevar på Tryggheim bur 215 på internat. Ventelista er spesielt lang for elevar som ønsker å bu på skuleområdet, men Tryggheim har også rekordinteresse blant elevar som bur heime.
- Vi treffer godt på eit behov der ute. Mange ønsker tilbodet vårt, seier Gjermund, som starta som Tryggheim-rektor for 20 år sidan.
Skulen har i år valt å styrke fritidstilbodet på kveldar og i helger. Fem tidlegare elevar jobbar som miljøarbeidarar, og kvintetten er i gang med å lage aktivitetar slik at elevane skal bli betre kjent med kvarandre. Laurdag laga miljøarbeidarane hagefest, og sundag tok dei med elevane på tur til Refnes.