Viljar vil bli fjellsikrar, mens Lotte ønsker å bli tømrar og arkitekt.

Dagskuleeleven Lotte frå Bryne set pris på at utdanningsprogrammet er praktisk retta.

- Eg likar betre å lære gjennom å gjere enn å sitte stille i eit klasserom og høyre på ein lærar, seier Lotte.

Internateleven Viljar frå Moi er einig.

- At kvardagen er praktisk, gjer at eg likar skulen betre enn nokon gong. Eg er ikkje ein type som klarar å sitte stille i klasserommet ei heil skuleveke, seier han. 

Praksis i bedrifter

Praktisk arbeid står på timeplanen både på skulen og i ulike bedrifter. Då Viljar fekk innblikk i fjellsikrar-yrket hos entreprenøren Risa AS, bestemte han seg for å søke seg vidare til Vg2 anleggsteknikk.

- Dagane i praksisperioden var fylte med fysisk tungt arbeid. Eg hadde 13-timarsdag og budde på brakke. Sjølv om det var tungt arbeid, fann eg ut at eg vil bli fjellsikrar og starte eige firma på sikt, seier han.

Fleirtalet av bygg- og anleggsteknikk-elevane prøvar seg hos ulike tømrarbedrifter i løpet av året. Lotte hadde praksis hos Neumann Bygg og lærte meir om treslag og materialeigenskapar, noko som er nyttig når ho skal vidare på Vg2 tømrar. Etter læretida vil ho ta bygg på teknisk fagskule og ønsker seinare å studere arkitektur.

- Eg vil lære korleis det er å bygge eit hus før eg begynner på arkitektstudiet. Med fagbrev som tømrar kan eg bli ein betre arkitekt, seier ho.