Lars og Espen går på Vg2 helsearbeidarfag. Dei lærer om menneske gjennom både teori og praksis. 

Espen frå Ålgård bur på internatet på Tryggheim og likar seg svært godt på helsefag.  

- Eg har lyst til å bli sjukepleiar når eg blir «stor», og her lærer eg veldig mykje om sjukdommar og sjukepleie. Me lærer korleis me pleier pasientar og snakkar med folk som har forskjellige sjukdommar. Å læra om relasjonar og kommunikasjon meiner eg er viktig anten ein vil arbeida på sjukehus, sjukeheim eller i andre helseinstitusjonar. 

Internatelev Lars frå Hommersåk har også planar om å bli sjukepleiar, og likar at undervisninga er så praktisk. 

- Me har praksisrom på skulen der me gjer praktiske øvingar. I tillegg lærer me om tema eg er interessert i, om sjukdommar og korleis me skal oppføra oss i lag med menneske. 

Praksisperiodar
På Vg1 har elevane to praksisperiodar på til saman tre veker. På Vg2 helsearbeidarfag har dei totalt sju veker praksis. Lars fortel om kjekke og spennande dagar då han fekk prøva seg som portør på sjukehuset i Stavanger. I neste periode skal han ha praksis på ein sjukeheim.  

Også Espen er nøgd med blandinga av teori og praksis.  

- Gjennom praksisen får me sjå korleis det er å jobba i ulike helseinstitusjonar, og i forkant har me lært mykje om det på skulen. Dette er det beste med å gå på helse- og oppvekstfag.

Lærer om menneske
Sara bur heime på Vigrestad, og valde Vg2 barne- og ungdomsarbeidarfag (BU) på Tryggheim fordi ho vil arbeida med menneske. 

- Eg er ikkje 100 % sikker på kva eg skal bli, men eg får utbytte av å gå på BU uansett, for det er interessant å læra om menneske. På Vg1 lærte me det grunnleggjande om kommunikasjon, korleis kroppen fungerer, sjukdommar og ernæring, og på Vg2 har me nettopp lært om kosthald for barn og ungdom. No har eg praksis i ein førsteklasse. 

Ein god del av opplæringa i barne- og ungdomsarbeidarfag inneber leik. Sara forklarer: 

- Ja, me leikar og har mykje gildt, men det er alltid ein grunn til at me leikar. Me lærer mykje om barn og ungdom som me ikkje har tenkt på før. I klassen har me eit veldig fint miljø, og lærarane har stort fokus på at me skal trivast.